09 октября 2013 г.
Лаш Таяпа ялĕнче Чăваш Республикин тава тивĕçлĕ тренерне Петр Самсонова асăнса çăмăл атлетсен районти уçă ăмăртăвĕ иртнĕ.
Петр Николаевич Самсонов 70-80-мĕш çулсенче республикăра чи паллă спортсменсенчен пĕри пулнă. Унăн вĕренекенĕ, Владимир Андреев, 20 çухрăма спорт мелĕпе утса Олимп вăййисенче бронза медаль çĕнсе илнĕ, тĕнчери, Европăри ăмăртусенче нумай хутчен чемпион, призер пулса тăнă.
Хальхи ăмăртăва районти шкулсенчен кăна мар, кỹршĕллĕ Тутарстан ялĕсенчен те çамрăк спортсменсем тупăшма килнĕ. Вĕсене Елчĕкри "Улăп" спорт керменĕн директорĕ Р.Григорьев, Лаш Таяпари вăтам шкул директорĕ И.Чернова, ялти шкул директорĕнче нумай çул ĕçленĕ, педагогика ветеранĕ В.Яковлев, çак ăмăртăва йĕркелекенĕ тата спонсорĕ В.Меметов саламланă.
Ăмăртура Елчĕкри вăтам шкул команди - пĕрремĕш, Хăвăлçырмасем - иккĕмĕш, Кĕçĕн Таяпасем виççĕмĕш вырăнсене йышăннă. Уйрăм дистанцисенче палăрнă участниксене, командăсене Хисеп грамотисемпе, медальсемпе чысланă.
Источник: "Елчĕк Ен"