24 января 2015 г.
Патреккелти пĕтĕмĕшле пĕлỹ паракан тĕп шкулта хоккей вăййи ХХ ĕмĕрĕн 70-мĕш çулĕсенчех аталанса кайнă. Шкулти хоккей команди "Ылтăн шайба" клубăн призĕсене районти çеç мар, республикăри вăйăсене те хутшăнса нумай çĕнсе илнипе палăрнă.
Вăхăт иртнĕ май хоккеистсен тумĕ кивелсе пынă. Ăна тăтăш çĕнетсе пынă. Кăçал та спонсорсен пулăшăвĕпе шкулти хоккеистсем çак вăййа çĕнĕ тумсемпе выляса кĕтсе илме пултарчĕç. Вăййăн çитĕнĕвĕнче лайăх выляни çеç мар, спортсменăн тумĕ те пысăк вырăн йышăнать тесе шутлатпăр эпир.
Хоккей вăййине вылянă чухне суран илесси те пулать. Халĕ вара ỹксен те ытти майпа аманасран хỹтĕленме маска-шлем, чĕркуççисене тата кăкăра хỹтĕлекен ытти инвентарьсемпе пуянланни, çавăн пекех лайăх хатĕрленĕ пăр та, ачасен дисциплини ỹсни те вăййа çỹллĕ шайра ирттерме майсем туса параççĕ.
Иртнĕ вĕренỹ çулĕнче шкулти хоккеистсен кĕçĕн ушкăнĕ республика шайĕнчи вăйăра 3-мĕш вырăн йышăнчĕ, Елчĕк район чысне тивĕçлипе хỹтĕлеме пултарчĕ. Ку вĕренỹ çулĕнче те хоккеистсен кĕçĕн ушкăнĕ район шайĕнчи ăмăртусене хутшăнма пысăк хавхаланупа хатĕрленет.
Патреккел шкулĕн администрацийĕ çитĕнекен ăрăва тивĕçлĕ воспитани илме, сывлăхĕсене çирĕплетме май туса паракан ырă чунлă çынсене тав тăвать. Питĕ пысăк тав сăмахне тивĕçнисен шутĕнче - шкула пĕр çул çеç мар ĕнтĕ спорт инвентарĕсемпе тивĕçтерекен районти Депутатсен пухăвĕн депутачĕ, акционерсен "Прогресс" хупă обществин ертỹçи П.Скворцов, Сыкинсем, А.Гаврилов, В.Орлов уйрăм предпринимательсем, Шупашкар хулинчи 37-мĕш шкулта ĕçлекен Г.Марков.
А.АДЮКОВ,
Патреккел шкулĕнче физкультурăна вĕрентекен.
Сăн ỹкерчĕкре: Патреккелти тĕп шкулти çамрăк хоккеистсем çĕнĕ тумпа.
Источник: "Елчĕк Ен"