21 октября 2015 г.
Сывлăхпа спорт кунĕнче районти 2000 çулта çуралнă тата çамрăкрах баскетболистсем ГИБДД инспекторне А.Маркова асăнса ирттернĕ пиллĕкмĕш турнира хутшăнчĕç.
Турнирта арçын ачасен Елчĕкри /2 команда/, Чăваш Тăрăмĕнчи, Кивĕ Эйпеçри, хĕрсен Елчĕкри, Аслă Елчĕкри, Кушкăри, Патреккелти шкулсен командисем тупăшрĕç. Вăйăсем Патреккелти шкулăн тата «Улăп» ФОК спорт залĕсенче иртрĕç.
Ăмăртăва хутшăнакансене Чăваш Республикин баскетбол федерацийĕн председателĕ С.Худаев, Андрей Марковăн ашшĕ Валерий, «Улăп» ФОК директорĕ Н.Григорьев саламларĕç, ăнăçу сунчĕç.
Хĕрсенчен Елчĕкри, Патреккелти, Аслă Елчĕкри шкулсен командисем пьедестал çине хăпарчĕç. Арçын ачасенчен Елчĕк шкулĕн пĕрремĕш команди, пĕлтĕрхи пекех, çĕнтерÿçĕ ята тивĕçрĕ. Елчĕк шкулĕн иккĕмĕш команди тата Кивĕ Эйпеçри шкулăн баскетболисчĕсем - призерсен йышĕнче.
«Чи лайăх тапăнса вылякан» ята Георгий Агеев, Виолетта Падуева /Елчĕк/, «Чи лайăх хÿтĕлевçĕ» ята Сергей Петров /Елчĕк/, Анна Чернова /Патреккел/, «Чи лайăх вылякан» ята Владислав Галкин /Елчĕк/, Ольга Павлова /Патреккел/ тивĕçрĕç.
Çĕнтерÿçĕ тата призерсен йышне кĕнĕ командăсене дипломсем, медальсем, призсем, кубоксем парса чысларĕç. Çавăн пекех турнира хутшăннисем те асăнмалăх призсене тивĕçрĕç.
Источник: "Елчĕк Ен"