11 ноября 2015 г.
Армспорт е урăхла алă вăйне виçни - юлашки вăхăтра хăвăрт аталанса пыракан çамрăк спорт тĕсĕ. Вĕсен йышĕ çулсерен ÿссе пынине армспорт енĕпе ирттерекен ăмăртусем сăнлаççĕ.
Комсомольски ялĕнчи «Кĕтне» физкультурăпа спорт комплексĕнче армспорт енĕпе «Урожай» спорт обществин республикăри чемпионачĕ иртнĕ. Унта 100 яхăн атлет тупăшнă. Елчĕк районĕнчи армрестлерсем Комсомольскипе Шупашкар районĕсен командисенчен кăшт каярах юлса виççĕмĕш вырăна тухнă. Вĕсене ăмăртăва А.Игнатьев ячĕллĕ ачасемпе çамрăксен шкулĕн обществăлла тренерĕ, армспортăн районти федерацийĕн председателĕ Сергей Солин хатĕрленĕ.
Уйрăм спортсменсем те начар мар кăтартусем кăтартнă. Хăйсен виçисенче Наталья Солина /Тĕмер/ - пĕрремĕш, Анна Гаврилова /Патреккел/, Николай Васильев /Елчĕк/, Светлана Дергунова /Кушкă/ иккĕмĕш вырăнсене йышăннă. Вĕсем дипломсемпе медальсене тивĕçнĕ.
Республика чемпионатĕнче çĕнтернĕ атлетсенчен çитес çул иртекен Пĕтĕм Раççейри ял вăййисене хутшăнма команда йĕркелеççĕ.
Источник: "Елчĕк Ен"