20 января 2016 г.
«Ылтăн шайба» клубăн призĕсемшĕн ăмăртусем пуçланчĕç.
Иртнĕ кунсенче Аслă Елчĕкри хоккей площадкинче «Ылтăн шайба» клубăн призĕсемшĕн аслă ушкăнри - 2001-2002 çулсенче çуралнă çамрăк хоккеистсен ăмăртăвĕ иртрĕ. Унта 4 команда - Елчĕкри, Аслă Елчĕкри, Лаш Таяпари вăтам, Патреккелĕнчи тĕп шкулсем хутшăнчĕç.
Вăйăсем питĕ çивĕч пулчĕç - кашниех çĕнтерÿçĕ ята çĕнсе илессишĕн тупăшрĕ. Финалта Елчĕксем Аслă Елчĕксене 4:3 шутпа çĕнтерчĕç, пĕрремĕш вырăна тухрĕç. Виççĕмĕшсем - Лаш Таяпасем.
«Чи лайăх вратарь» ята Артем Князев /Лаш Таяпа/, «Чи лайăх хÿтĕленсе вылякан» ята Евгений Теллин /Елчĕк/, «Чи лайăх тапăнса вылякан» ята Станислав Мисяков /Аслă Елчĕк/ тивĕçрĕç.
Шăматкун Патреккелĕнчи хоккей площадкинче вăтам ушкăнри - 2003-2004 çулсенче çуралнă арçын ачасем республикăри турнирăн пĕрремĕш тапхăрти ăмăртăвне хутшăнчĕç. Пирĕн район команди Патăрьелсене, Шăмăршăсемпе Комсомольскисене хыçа хăварса пĕрремĕш вырăна тухрĕ, ăмăртăвăн иккĕмĕш тапхăрне хутшăнма тивĕçрĕ. Район командин чысне А.Адюков ертсе пынипе Елчĕкри, Лаш Таяпари, Патреккелĕнчи шкулсенчи çамрăк хоккеистсем хÿтелерĕç.
А.ФЕДОРОВ.
Сăнÿкерчĕкре: вăйă саманчĕ.
Источник: "Елчĕк Ен"