26 марта 2016 г.
Елчĕк тăрăхĕ вăйлă та патвар çынсемпе яланах палăрнă. Ахальтен мар ĕнтĕ пирĕн районта йывăр атлетика спорчĕ тата кире пуканĕ йăтасси - чи аталаннисенчен пĕри. Республика шайĕнче те тăтăшах пирĕн командăсем малти вырăнсене йышăнаççĕ. Елчĕк районĕнче арçынсем килĕштерекен тепĕр спорт дисциплини вăл - пауэрлифтинг /силовое троеборье/. Спортсменсем штангăна виçĕ енлĕ хускану туса чи вăйлисене палăртаççĕ. Иртнĕ канмалли кунсенче Елчĕкри спорт çуртĕнче шăпах пауэрлифтинг енĕпе район чемпионачĕ иртрĕ. Ăмăртăва Чăваш Республикин чемпионне Николай Николаева /йывăр тăпри çăмăл пултăр/ халалланă. Спортсменсене Елчĕк ял тăрăхĕн пуçлăхĕ Юрий Блинов, районти пауэрлифтинг федерацийĕн ертÿçи Василий Чернов, ăмăртăвăн тĕп спонсорĕ Юрий Николаев /Николай Николаевăн пиччĕшĕ/ саламларĕç.
Кĕçех хĕрÿ ăмăрту пуçланчĕ. Хальхинче çичĕ команда спортсменĕсем помост çине тухрĕç. Вĕсенчен иккĕшĕ - Тăрăм ял тăрăхĕн тата Таяпа Энтри шкулĕн командисем пуçласа çакăн йышши мероприятие хутшăнчĕç. Кашни виçерех ăмăрту çивĕч иртрĕ. Çапах та спорт судйисем чи вăйлисене палăртрĕç. Район чемпионĕсем Андрей Мазюкин, Сергей Прохоров /иккĕшĕ те Курнавăш ял тăрăхĕ/, Павел Петровпа Василий Демьянов /Тăрăм ял тăрăхĕ/, Анатолий Иноходов /«Юман» спорт клубĕ/, Антон Демьянов /Елчĕк шкулĕ/ тата Юрий Чернов /Аслă Елчĕк ял тăрăхĕ/ пулса тăчĕç, 49 çулхи Юрий Чернов абсолютлă чемпион ятне çĕнсе илме пултарчĕ. Вăл çамрăксемшĕн - ырă тĕслĕх. Çавăн пекех тĕрлĕ виçесенче кĕмĕл тата пăхăр медальсене Елчĕк шкулĕнчи Александр Ишмуратов, Артем Перцев, Егор Иванов, Патреккел ялĕнчи Сергей Миллин, Денис Московский, Данил Петров, Курнавăш ял тăрăхĕнчи Никита Пронин, Станислав Иванов, Геннадий Мударисов, Алексей Смирнов, Кивĕ Эйпеçри Владимир Семенов, Тăрăм ял тăрăхĕнчи Вадим Александров тивĕçрĕç.
Куçса çÿрекен кубока, пĕлтĕрхи пекех, Елчĕк ял тăрăхĕн туслă команди çĕнсе илчĕ. Призерсен йышĕнче Курнавăш тата Тăрăм ял тăрăхĕсенчи командăсем.
Виктор ДЕМЬЯНОВ.
Источник: "Елчĕк Ен"