30 ноября 2016 г.
Тунтикун район администрацийĕн пуçлăхĕ Николай Миллин райадминистрацин структура подразделенийĕсен, ял тăрăхĕсен, предприятисемпе организацисен ертÿçисемпе канашлу ирттернĕ.
Кун йĕркинчи пĕрремĕш ыйтупа - «Елчĕк районĕнче физкультурăпа спорта малалла аталантарас тĕлĕшпе умри тĕллевсем çинчен» район администрацийĕн пуçлăхĕн пĕрремĕш çумĕ Леонард Левый тухса калаçрĕ. Вăл чи малтанах Чăваш Республикин Физкультурăпа спорт министерствин коллегийĕн анлă ларăвĕнче пăхса тухнă ыйтусем çинче чарăнса тăчĕ. Вĕсенчен пĕри - «Физкультурăпа спорт аталанăвĕ» патшалăх программине республикăра мĕнле пурнăçласа пыни. Ку енĕпе Елчĕк районĕнчи спорта юратакансем кайрисем мар. Уйрăмах кире пуканĕ тата штанга йăтакансем савăнтараççĕ. Нумаях пулмасть Елчĕкри кире пуканĕ йăтакансем, «Хыпар» хаçат парнисене çĕнсе илессишĕн Пĕтĕм Раççейри турнирта Чăваш ялхуçалăх академийĕн командине мала ирттерсе /унта та командăн 80 проценчĕ Елчĕкрен тухнă йывăр атлетсенчен тăрать/, иккĕмĕш вырăн йышăннă. Александр Павлов Казахстанра иртнĕ тĕнче чемпионатĕнче çĕнтернĕ, Сергей Соловьев районта чи малтан кире пуканĕ йăтассипе тĕнче класлă спорт мастерĕ ята тивĕçнĕ. Андрей Кузнецов Санкт-Петербургри турнирта мала тухнă. Штанга йăтассипе Алина Панкратова çĕршыв чемпионатĕнче виççĕмĕш вырăн йышăннă. Район шайĕнче те пысăк ăмăртусем çÿллĕ шайра иртеççĕ. Мини-футбол енĕпе А.Малова, штанга йăтассипе И.Портнова асăнса йĕркеленĕ турнирсем те участниксен йышĕпе, унти кăтартнă результатсемпе палăрса тăраççĕ. Чăваш Республикинчи патшалăх влаçĕн органĕсенче тата вырăнти хăйтытăмлăх органĕсенче ĕçлекенсен спартакиадинче шывра ишессипе Елчĕксем 26 команда хушшинче улттăмĕш вырăн йышăннă.
Физкультурăна тата спорта малалла аталантарма районта условисем çителĕклĕ: 21 спорт залĕ /кашни çул иккĕш-виççĕшне тĕпрен юсаççĕ/, стандартлă 10 хоккей площадки, сывлăха çирĕплетекен «Улăп» комплекс. «Улăп» комплексра спортăн тĕрлĕ тĕсĕсене аталантармалли лайăх майсем пур. Анчах вĕсемпе туллин усă курманнине палăртрĕ Леонард Левый. Акă, «Улăпра» шывра ишмелли бассейна кÿршĕсенчен маларах хута янă, унти условисем те лайăхрах. Анчах кăтартусем савăнтармаççĕ. Сывлăха çирĕплетекен «Улăп» комплекса йĕркелени 9 çул çитнине халалланă районти уçă ăмăртăва кÿршĕллĕ 4 район ишевçисем те килнĕ. Тĕрлĕ дистанцисенче ытларах Патăрьелсем мала тухнă, пирĕн иккĕмĕш вырăнсемпе çырлахма тивнĕ. Район администрацийĕн пуçлăхĕпе унăн пĕрремĕш çумĕ çакăн сăлтавне тренерсем ĕçлесе çитерейменнинче кураççĕ.
Хĕле те кĕтĕмĕр, чылай çĕрте пăрлантарнă площадкăсенче ачасем хоккейла выляççĕ, конькипе ярăнаççĕ. Пирĕн вĕсенче шăплăх хуçаланать: Елчĕкри шкулти хоккей площадкине шыва шăнтма сивĕ çитмест, шыв çухалать имĕш. Хоккей площадкине йĕркене кĕртсе çитереймен-ха.
Леонард Левый ГТО комплексне ĕçе кĕртесси çинче те чарăнса тăчĕ. Халĕ ГТО комплексĕн сайтĕнче участниксем регистрациленес тата уйрăм номер илес тапхăр пырать. Шкул ачисем нормативсене пама тытăннă ĕнтĕ. Çĕнĕ çул хыççăн вăйпитти çынсемпе ачасем нормативсене тултарассипе пикенсе ĕçлемеллине палăртрĕç канашлура.
Экономика, пурлăх тата çĕр хутшăнăвĕсен пайĕн начальникĕ Марина Павлова дача амнистийĕ 2018 çулхи мартăн 1-мĕшĕччен вăйра тăнине, çĕр çинче вырнаçнă куçман пурлăха унпа усă курса çăмăллăн регистрацилеме май пулнине аса илтерчĕ.
Культура тата информаципе тивĕçтерекен пай начальникĕ Антонина Александрова, «Елчĕк ен» хаçатăн тĕп редакторĕ Николай Алексеев, Раççей Почтин районти уйрăмĕн начальникĕ Петр Блинов хаçат-журнала 2017 çулхи пĕрремĕш çур çулта çырăнса илмелли кампани, вĕсене çырăнса илмелли тĕрлĕ майсем çинчен каласа пачĕç, «Ырлăх йывăççи» акцие хутшăнса сахал тупăшлă çемьесене хаçат-журнал çырăнса пама сĕнчĕç.
Источник: "Елчĕк Ен"