11 февраля 2017 г.
Пирĕн районта шайбăпа хоккейла вылясси иртнĕ ĕмĕрĕн 60-мĕш çулĕсен вĕçĕнче аталанма тытăннă. Ялсенче çамрăксем малтан çăматă тăхăнса вылянă. Каярах яка пăр çине конькипе тăнă. Патреккелти, Лаш Таяпари, Яманчÿрелĕнчи, Тĕмерти шкул ачисем районта чи малтан шайбăпа хоккейла выляма пуçланă. «Ылтăн шайба» клуб парнисемшĕн ăмăртусем ВЛКСМ райкомĕн секретарĕ Петр Сидоров /Лаш Таяпа/ пуçарнипе районта пуçласа 1971 çулта иртнĕ.
Лаш Таяпари Юрий Воронин çак ăмăртусене чи малтан хутшăнакансенчен пĕри пулнă. Çитĕнсен те хоккей вылянă, вратарь пулнă. Лаш Таяпасем йывăр чире пула пурнăçран вăхăтсăр уйрăлса кайнă Юрий Воронина манмаççĕ. Кашни çулах ялта ăна асăнса турнир ирттереççĕ. Ăна хоккей ветеранĕн ывăлĕсем Александр, Андрей тата Алексей йĕркелеççĕ.
Кăçалхи турнирта та тĕлпулусем çивĕч иртнĕ. Пĕрремĕш вырăна Аслă Елчĕк ялĕн хоккеисчĕсем йышăннă. Иккĕмĕш вырăна площадка хуçисем тухнă. Тĕмер ялĕн команди - виççĕмĕш.
Источник: "Елчĕк Ен"