05 апреля 2017 г.
Çуран чупма юратакансем кашни çулах çуллахи спорт сезонне «Елчĕк ен» хаçат парнисене çĕнсе илессишĕн çăмăл атлетсен кросĕнчен пуçлаççĕ. Кăçал та апрелĕн 14-мĕшĕнче Елчĕкри «пасар-халăха ĕçпе тивĕçтерекен центр» трассăпа атлетсен 39-мĕш кросне ирттерме палăртнă. Вăл 11 сехетре пуçланать.
Çавăн пекех атлетсен çурхи кросĕ Чăваш Республикинчи прессăн спорт фестивалĕн - СССР космонавт летчикне, Совет Союзĕн икĕ хут Геройне А.Г. Николаева асăнса «Советская Чувашия» хаçат парнисене çĕнсе илессишĕн 79-мĕш эстафета чупăвĕн пĕрремĕш тапхăрĕ те шутланать.
Ăмăрту участникĕсем
Пĕтĕмĕшле пĕлÿ паракан тĕп тата вăтам шкулсен, ял тăрăхĕсен, ялхуçалăх тата промышленноç предприятийĕсен, организацисемпе учрежденисен командисем хутшăнаççĕ.
Ăмăрту программи
I ушкăнра 2006 çулта çуралнă тата çамрăкрах хĕрачасемпе арçын ачасем 500 метра, II ушкăнра 2004-2005 çулсенче çуралнă хĕрачасем 500 метра, арçын ачасем 1000 метра, III ушкăнра 2002-2003 çулсенче çуралнă хĕрачасем 1000 метра, арçын ачасем 2000 метра, IV ушкăнра 1999-2001 çулсенче çуралнă хĕрсем 2000 метра, яшсем 3000 метра, V ушкăнра хĕрарăмсем 1000 метра, арçынсем 2000 метра, 35 çултан иртнĕ хĕрарăмсем 500 метра, 40 çултан иртнĕ арçынсем 1000 метра чупаççĕ.
Пĕтĕмĕшле пĕлÿ паракан тĕп шкулсен командисен зачетне чи лайăх кăтарту тунă 10 результат, вăтам шкул командисен зачетне чи лайăх кăтарту тунă 14 результат, предприятисемпе организацисен, ял тăрăхĕсен зачетне арçынсемпе хĕрарăмсен, ветерансен /пĕрер/ результачĕсем кĕреççĕ.
Командăсемпе участниксене чыслани
Мала тухнă командăсене куçса çÿрекен кубоксем, призерсене дипломсем парса чыслаççĕ. Уйрăм дистанцинче çĕнтернĕ çăмăл атлетсене «Елчĕк ен» хаçата 2017 çулхи иккĕмĕш çур çулшăн /енчен те кашни дистанцие 4-шар атлетран кая мар хутшăнсан/ тÿлевсĕр çырăнтарса параççĕ.
Заявкăсем тăратасси
Командăна, участниксен /хушамат, ят, ашшĕ ятне, çуралнă çула/, дистанцине палăртнă заявкăсене ăмăрту кунĕнче 10 сехетчен йышăнаççĕ. Заявкăсене организацисен ертÿçисемпе медицина ĕçченĕсем алă пусса пичетпе çирĕплетмелле. Тĕплĕнрех 2-51-81 телефонпа ыйтса пĕлмелле.
«Елчĕк ен» хаçат редакцийĕ.
Источник: "Елчĕк Ен"