01 июля 2017 г.
Социализмла Ĕç Геройне, Ленин орденлă "Победа" колхозри комплекслă бригадăна ертсе пынă Иван Алексеевич Михайловские асăнса йĕркеленĕ футбол турнирĕ кăçалхипе вунпĕрмĕш хут иртрĕ.
Хальхинче унта 8 команда хутшăнчĕ. Тутарстанри Мăкăр ялĕнчи, Вăрмар, Канаш районĕсенчи, хамăр районти "Прогресс" АХОри, Кушкăри, Лаш Таяпари тата Аслă Пăла Тимешри 2 команда хăйсен ăсталăхĕпе паллаштарчĕç.
Виççĕмĕш вырăншăн Лаш Таяпасемпе Вăрмарсем тупăшрĕç. Лаш Таяпасем 1:0 шутпа çĕнтерчĕç. Иккĕмĕш вырăнта - "Прогрессем". Вĕсене "Юман" команда 3:0 шутпа парăнтарса кубока çĕнсе илчĕ.
Турнирта чи лайăххисене те палăртрĕç. "Чи лайăх вратарь" ята Михаил Дмитриев ("Юман") тивĕçрĕ. "Чи лайăх хỹтĕленсе вылякан" - Алексей Воронцов (Патреккел), "Чи лайăх çурма хỹтĕленсе вылякан" - Иван Иванов (Вăрмар), "Чи лайăх тапăнса вылякан" - Денис Портнов ("Юман"), "Чи нумай мечĕк тапса кĕртекен" - Владимир Викторов ("Юман") пулчĕç.
Турнирта çĕнтернĕ командăсене Хисеп грамотисемпе, медальсемпе, призсемпе хавхалантарчĕç. Ăмăртăва йĕркелесе ирттерме пулăшнă ырă кăмăллă çынсем те Михайловскисен çемйинчен Тав хучĕсем илме тивĕç пулчĕç. Спорт мероприятийĕ Аслă Пăла Тимешсемшĕн ял уявĕ пекех савăнăçлă та хаваслă иртрĕ.
Сăнỹкерчĕкре: "Юман" çĕнтерỹçĕ команда.
Источник: "Елчĕк Ен"