10 февраля 2016 г.
Тунтикун район администрацийĕн пуçлăхĕн тивĕçĕсене пурнăçласа пыракан Леонард Левый предприятисемпе организацисен, райадминистрацин структура подразделенийĕсен ертÿçисемпе, ял тăрăхĕсен пуçлăхĕсемпе канашлу ирттернĕ.
Чи малтанах вăл иртнĕ эрнери паллă пулăмсем çинче чарăнса тăчĕ. Вĕсем - Шупашкарта Раççейре - Кино, Чăваш Республикинче - Ĕç çынни çулталăкне савăнăçлă лару-тăрура уçни, мероприяти вăхăтĕнче ĕç династийĕсене, çав шутра Патреккелти Миллинсен ĕç стажĕ 661 çул шутланакан династине чыслани, оборонăпа массăллă спорт уйăхлăхĕ вăхăтĕнчи спорт ăмăртăвĕсем. Вырсарникун вара «Раççей йĕлтĕр йĕрĕ - 2016» программăпа йĕлтĕрçĕсен чупăвĕ иртет. Леонард Левый унта курса тăма кăна мар, активлă хутшăнма чĕнсе каларĕ.
Кун йĕркинчи пĕрремĕш ыйтупа - Елчĕк районĕнчи граждансен çырăвĕсемпе 2015 çулта мĕнле ĕçлесе пыни çинчен район администрацийĕн ĕçĕсен управляющийĕ Евгения Михайлова паллаштарчĕ. Пĕлтĕр район администрацине граждансем 582 хутчен çыру янă тата район администрацинче йышăнура пулнă. Ытларах çынсем çурт-йĕрпе, çĕрпе, социаллă пулăшупа тивĕçтерес ыйтусем панă. Килсе кĕнĕ çырусенчен 76-шне тивĕçтернĕ, 89-шне ăнлантарса хурав панă, 187 заявлени тăрăх правăпа норматив акчĕсем йышăннă, 2 çынна тавлашуллă ыйтусене татса пама суда кайма сĕннĕ.
Район администрацийĕн капиталлă строительство тата ЖКХ енĕпе ĕçлекен пайăн 2015 çулхи ĕçĕ-хĕлĕ çинчен унăн начальникĕ Николай Петров каласа пачĕ. Пĕлтĕр районта пурăнмалли çурт-йĕр 5957 тăваткал метр ĕçе кĕртнĕ. Тĕрлĕ программăсене пурнăçласа 36 çемье пурăнмалли çурт-йĕр условийĕсене лайăхлатнă. Лаш Таяпари культура çуртне тата Çĕнĕ Пăвари ача садне тĕпрен юсанă, Чăваш Тăрăмĕнче, Тĕмерте, Яманчÿрелте фельдшерпа акушер пункчĕсем ĕçе кĕртнĕ, республика пĕлтерĕшлĕ çула тĕпрен, нумай хваттерлĕ çуртсен умĕсенчи территорие юсанă, ял урамĕсене вак чул сарса хытарнă тата ытти те.
Сыснасен Африка чумине хирĕç туса ирттермелли профилактика ĕçĕсем пирки выльăх-чĕрлĕх чирĕсене хирĕç кĕрешекен районти ветеринари станцийĕн начальникĕ Ирина Николаева тĕплĕн чарăнса тăчĕ /тĕплĕнрех иккĕмĕш страницăра вулăр/.
«Россельхозцентр» патшалăх учрежденийĕн Елчĕк районĕнчи филиалĕн начальникĕ Лидия Ишмуратова пĕлтернĕ тăрăх, çуркунне акмалли вăрлăхăн 71 проценчĕ кондициллĕ. Анчах кондицие тивĕçмен, репродукци пĕчĕк вăрлăх та пур-ха.
Февралĕн 6-мĕшĕнче Чăваш Республикин Пуçлăхĕ Михаил Игнатьев район администрацийĕсен пуçлăхĕсемпе видеоселектор мелĕпе канашлу ирттернĕ. Унта вăрттăн ĕçлеве чакарас, ĕç укçи тÿлемелли вăрттăн схемăсене легализацилес, муниципаллă районсенче коммуналлă хуçалăхри хытă каяшсене уйрăммăн пуçтарса свалкăна илсе тухас ыйтусене пăхса тухнă. Экономика, пурлăхпа çĕр хутшăнăвĕсен пайĕн начальникĕ Марина Павлова каланă тăрăх, пĕлтĕр районта «вăрттăн схемăпа» вăй хуракан çынсене тупса палăртассипе рейдсем ирттернĕ. Ку енĕпе чылай тĕслĕх тупса палăртнă. «Вăрттăн схемăпа» ĕçлекенсем ĕç паракансемпе ĕç килĕшĕвĕсем тунă. Çакнашкал рейдсене кăçал та ирттереççĕ. Каяшсене пуçтарса ятарлă вырăна илсе тухнă хыççăн вĕсене уйăрса илсе ĕçлесе хатĕрлеме пуçтарас ĕçе мĕнле йĕркелесси çинчен районти эколог Алексей Борисов паллаштарчĕ.
Канашлура район пурнăçĕпе çыхăннă ытти ыйтусене те сÿтсе явнă.
Источник: "Елчĕк Ен"