17 февраля 2016 г.
Тунтикун район администрацийĕн пуçлăхĕн тивĕçĕсене пурнăçлакан Леонард Левый райадминистрацин структура подразделенийĕсен, ял тăрăхĕсен, предприятисемпе организацисен ертÿçисемпе канашлу ирттернĕ.
Канашлăва пухăннисем чи малтанах Демократиллĕ Афганистан Республикинче интернационалла тивĕçе пурнăçласа пуçĕсене хунă салтаксене асăнса пĕр минут шăп тăчĕç. Елчĕк районĕнчен унта 300 ытла çамрăк çар тивĕçне пурнăçланă, виççĕшĕ паттăрсен вилĕмĕпе вилнĕ. Леонард Левый пĕлтернĕ тăрăх, Тăван çĕршыва таврăннă ентешсенчен вăрçă суранĕсене, сывлăх хавшанине пула çак вăхăтра 50 ытла ветеран пурнăçран вăхăтсăр уйрăлса кайнă.
Кану кунĕсенче Аслă Елчĕкре пысăк хоккей турнирĕ, Чăваш Тăрăмĕнче Юрий Львов воин-афганец призĕсене çĕнсе илессишĕн йĕлтĕрçĕсен районти ăмăртăвĕ иртнĕ.
«Раççей йĕлтĕр йĕрĕ - 2016» чупу çинчен ачасемпе çамрăксен спорт шкулĕн директорĕ Роберт Григорьев каласа пачĕ. Вăл палăртнă тăрăх, Елчĕкри, ял тăрăхĕсенчи чупăва районĕпе тĕрлĕ çулсенчи 770 çын хутшăннă, ку вăл пĕлтĕрхинчен йышлăрах. Район администрацийĕн пуçлăхĕн тивĕçĕсене пурнăçлакан Леонард Левый та Елчĕкри вăтам шкултан, районти тĕп больницăран участниксем йышлă пулнине, Аслă Елчĕкре, Елчĕкре, Çирĕклĕ Шăхалĕнче те чупăва ăнăçлă йĕркеленине палăртрĕ.
Малалла Роберт Григорьев ГТО нормативĕсене парасси совет тапхăрĕнче мĕнле иртнин историйĕпе паллаштарчĕ. ГТОн хальхи нормативĕсене памалли çĕнĕ йĕркесем çинче тĕплĕн чарăнса тăчĕ. Районта ГТО нормативĕсене памалли 4 центр туса хунă: физкультурăпа сывлăха çирĕплетекен комплексра, Елчĕкри, Курнавăшри, Лаш Таяпари вăтам шкулсенче. Судьясене çирĕплетнĕ, тĕп судья - Кивĕ Эйпеçри шкулти физкультура учителĕ Виталий Марков. Хальхи вăхăтра пулас участниксен ГТОн официаллă сайтĕнче регистрациленес ĕç пырать. Пирĕн районта идентификаци номерне халăхăн 10 проценчĕ илнĕ. Ку енĕпе вĕренÿ учрежденийĕсенче тата район администрацийĕнче ĕçлекенсем пуçаруллă.
Иртнĕ эрнере района ЧР Ĕç тата социаллă хÿтлĕх министрĕ Сергей Димитриев килсе кайнă. Вăл район администрацийĕнче халăха социаллă пулăшу паракан пай, халăха социаллă пулăшу паракан центр, халăха ĕçпе тивĕçтерекен районти центр представителĕсемпе канашлу ирттернĕ. Тунтикунхи канашлура халăха социалă пулăшу паракан центр директорĕ Галина Лаврова хăй ертсе пыракан коллективăн 2015 çулхи ĕçĕ-хĕлĕ çинчен каласа пачĕ. Леонард Левый центрăн ĕçри çитменлĕхĕсене, вĕсене пĕтермелли майсене палăртрĕ.
Район администрацийĕн вĕренÿ тата çамрăксен политикин пайĕн ертсе пыракан специалисчĕ Фаина Цыганова «Ачалăх ячĕпе, ачалăхшăн» ыркăмăллăх марафонĕ февралĕн 9-мĕшĕнче пуçланни, иртнĕ çул пуçтарнă укçа-тенке мĕнле расхутлани çинчен каласа пачĕ. Вăл пĕтĕмпех района - ача сачĕсене, тĕп больницăн ача-пăча уйрăмне аталантарма юлать. Леонард Левый çак пархатарлă ĕçе иртнĕ çулхинчен лайăхрах хутшăнма чĕнсе каларĕ.
Район администрацийĕн пуçлăхĕн тивĕçĕсене пурнăçлакан - вĕренÿ тата çамрăксен политикин пайĕн начальникĕ Леонард Левый вĕрентÿ ĕçĕн 2015 çулхи тĕп кăтартăвĕсемпе паллаштарчĕ.
Канашлура район пурнăçĕпе çыхăннă ытти ыйтусене те сÿтсе явнă.
Источник: "Елчĕк Ен"